Wanachuo 17 waliofadhiliwa na Tulia Trust wahitimu TaSUBa.

Posted on: March 1st, 2019

Jumla ya wahitimu 17 kutoka wilaya za Rungwe,Busokelo na Kyela, Mkoa wa Mbeya wamehitimu Mafunzo maalumu ya mwezi mmoja yaliyoanza tarehe 04.02.2019 na kuhitimishwa leo katika Taasisi ya Sanaa na Utamaduni Bagamoyo(TaSUBa).

Mafunzo hayo yalifadhiliwa na Taasisi ya Tulia Trust, ambapo  vijana wote 17 walilipiwa  gharama zote za mafunzo.

Akizungumza leo wakati wa  mahafali hayo ,Mkuu wa Chuo wa TaSUBa  Dkt.Herbert Makoye amewataka wahitimu kuyatumia vizuri maarifa waliyoyapata katika kuongeza thamani ya shughuli zao za sanaa wanazozifanya ili ziwaongezee kipato na ziwafungulie fursa nyingine.

Naye Mwakilishi wa wahitimu Bw.Peter Mwapagatwa,ameishukuru Tulia Trust kwa kuwawezesha kupata mafunzo hayo ambayo yatakuwa na manufaa sana katika utendaji wa kazi zao za sanaa

“Tukiwa hapa TaSUBa tumejifunza uchezaji ngoma za asili ya Tanzania, ngoma za ubunifu, muziki wa asili ya Tanzania, uigizaji, matumizi ya jukwaa na maleba,ambapo kabla ya kuja TaSUBa hatukuwa na maarifa hayo bali tulikuwa tunafanya kwa mazoea tu”alisema Mwapagatwa

Vijana hao 17 wametoka kwenye vikundi vya ngoma vilivyoshiriki katika Tamasha la Ngoma za Asili la Tulia lililofanyika  Oktoba mwaka jana katika mji wa Tukuyu mkoani Mbeya .

Hii ni awamu ya pili, ambapo katika awamu ya kwanza jumla ya vijana 19  walipatiwa mafunzo hayo maalumu.

Pia Taasisi ya  Tulia imetoa ufadhili wa masomo kwa kwa ngazi ya Astashahada (Certificate) na Stashahada (Diploma) kwa vijana 8 wanaondelea na masomo yao katika Taasisi ya Sanaa na Utamaduni Bagamoyo (TaSUBa).